Gorpuztu mediazio kulturala eta arte-hezkuntza proiektua da, auzo bereko leku ezberdinetan garatzen dena (eskola, kalea eta kulturgunea). Gorputza ikaskuntza prozesuetan modu berri eta esperimentalean barneratu nahi da, bide parte-hartzaileak bultzatzen dituzten arte eta hezkuntza ekimenen bitartez, gure bizipenak eta inguratzen gaituzten espazioak eraldatzeko helburuarekin.

arte-hezkuntza proiektua

eskola

espazio publikoa

praktika performatiboak 

Gorpuztuk ikaskuntza prozesuak garatzeko gorputzaren bitartezko esperimentaziora gonbidatzen du, hezkuntza formalaren testuinguruaren barne. Gorputzaren erabilera, espazioen ikerketa, jabetze, esku-hartze eta eraldaketarako proposatzen du, gorputzarekin lotuak dauden arau eta erabilpenak iraultzeko asmoz. 

Gure jarrerek eta egoteko moduek ingurunean dituzten eraginei buruz ohartaraztea eta jakintza hauek partekatzea proposatzen du proiektuak.  Pertsona eta talde ezberdinek espazio desberdinetan egoteko eta hauekin erlazionatzeko dituzte moduak aztertu eta balioan ipiniko ditugu, kasu honetan, gazteek haien inguruneak bizitzeko dituzten moduak. 

Proiektua 2015ean garatzen da, Bilboko Irala auzoan kokaturiko Eskurtze Institutuko ikasleekin batera (DBHko 2º eta 4º mailakoekin), hurrengo espazioen ikerketa eta eraldaketa proposatuz: institutua, Irala auzoa eta Azkuna Zentroa.

Espazio ezberdin hauen ikerketa gauzatzen da, espazioarekin erlazionatzeko modu desberdinak esperimentatzen dira eta azkenik beste erabilera batzuk proposatu egiten dira. 


Ekintza guzti hauek kolektibo parte-hartzaile desberdinengandik proposatuak dira: 

Eskurtze Institutua Javier Lozano, Hezkuntza Fisikoko irakaslea. 

TTipi Studio. Espazioaren ikerketarako tailerren proposamena. 

Amaia Navascués. Gorputz-kontzientzia eta mugimendu tailerren proposamena. 

Horman Poster Igor de Quadra: Ekintzen bitartezko espazioaren eraldaketarako proposamena.

Maite Zabaleta  Prozesuaren erregistroa. Liburuxken sorkuntza. 

Las Chicas de Pasaik Prozesuaren erregistroa. Sorkuntza audiobisualak. 

Proiektu hau Eusko Jaurlaritzaren Hezkuntza, Hizkuntza Politika eta Kultura sailak babestutako da.

Esperientzia honen bitartez ikaslegoak, ikastetxearen, auzoaren eta kulturgunearen  historia ikertu zuen, bertako pertsonei eginiko elkarrizketen bitartez, espazioak jasandako eraldaketak bilduz, eta bizilagun desberdinen istorio pertsonalak eta haien espazioarekiko loturak ezagutuz. Gainera, gune horietan egoteko beste moduak esperimentatu ziren, hauek bizitzeko aukera berriak proposatuz. Prozesuaren hainbat akzio honako hauek izan ziren: 
Jolastokiak zituen erabilpenen ikerketa, honen ondoren ikasleek txikitako jolas batzuen berreskuratzea proposatu zutelarik. 
Auzotik ibilaldi ez gidatu bat, espazio desberdin bakoitzean norberaren bizipen pertsonalak partekatuz joan zirelarik.
Ekintza desberdinez osaturiko ibilbide baten sorrera, ginkana moduan, kulturguneko atriotik zehar. 

Proiektuaren garapenenean zailtasunik handiena, arte-proiektua hezkuntza formalaren testuinguruarekin lotzea izan zen, eragile parte-hartzaile guztientzat onuragarria izan zedin. 

Galdera batzuk etortzen zaizkigu burura: Zein baldintza sustatu beharko lituzke hezkuntza-testuinguruak artea tresna pedagogiko gisa sustatu ahal izateko? Nola sortu ditzakegu modu kolektiboan arte-proiektuak irakaslegoarekin batera? Nola zaindu ditzakegu hezkuntza-testuinguruaren erritmoak, beharrak, helburuak eta aldi berean eraldaketak sortu?